Qomê mao delali, Dêsimizê qedirgirani,

Ez wazen ke, meremê zerê xo eve zonê moa xo, sima rê arezekerine.

Pilu vato ke, her vas kokê xo sero roêno, her teyr eve zonê xo waneno.

Ma ki isonime, binê osmêne khewi de serê hardê Dewresi de zu rengime zu vengime.

Hardê dewresi sero, reng u vengê bini çigasi ke wayirê heqe u asaletiyê, honde heqa ma ki esta.

Gere ke na heqe ra kes morim mevino na heqe ma rê jede mevino. O waxt ma gere na pers xora perskeme.

Heqe u esaletê xo, kamiya xo koti kamiji meqam de biamera zon ke, alem vengê ma bihesno. Helvet ke, ison heme ca heqa xo mudefa kerdene sero gureyêno. Hama caê esto ke, temsilkarê isoni ke uza bi, eke eve vengo de areze u heqaniyet heqa qomê xuyê mazlumi ardera zon, dina o veng ra bena xeverdare.

O meqam Parlamentowo. Parlamentoyê Turkiya de hata ve nika vengê ma Dêsimizu eve kamiya Dêsimi coru areze temsil nêbiyo. Qetlê Dêsimi, surginê Dêsimi, talan terisê Dêsimi eve fikrê na waxt isoniye era zon nêamo.

Çixas ke gegane qalê Dêsimi biyo uza çarno tayê mesulunê binu ra, hen qeseykerdo. Çetiniya Dêsimi, tenga Dêsimi eke eve xoseriya Dêsimi era zon nêarde kes gosnêdano.

Dêsimiji xêle waxto mesela Dêsimi sero gureyênê. Ez ki eve kamiya vervekiye ra xêyle serio Dewa Dêsimi rê xizmete ken. Mekemunê Turkiya de, Mekemê Awrupa de Verfekê Dêsimi u vengê Dêsimiune. Mi ke dewa Seyd Rizay u alvozunê ey Seyidunê Dêsimi kerde ra, zofe tenu mi ra vake ke, “caverde cira duri vinde”. Nika dewa Dêsimi xêyle avê ama, dina de xêyle cau de dewa Dêsimi endi nasbena. Ma ke na dewa sero nêguriyêne, nêqefeliyêne, Servezirê Tirkiya Erdogani qale “Tertelê Dêsimi” nêkerdêne.

Dewa Desim Kilite Demokrasiye Anadolia

Kilitê Demokrasiyê Anadoliye, eve hastiye u eve zerepakiye dewa Dêsimi qewulkerdene u dirvetê Dêsimi weskerdene dero. Dewa Dêsimi teyna dewa Mamekiye (Tunceli) niya. Qoçgiriye, Çorum, Meras, Meladiya u qirrkerdena qomê mayê Anadoliye pêro dewa Desimia. Dewlete ke na tertele, surgin u qirrkerdene sero qeseykerdene qewul kerde, dirveti pistene sero guriye, tenga Miletê Kurdi dahil her meselu u tengiye sero qeseykena. O waxt tenganiya welati sero çare saêkerdena teyna bena rete.

Tenganiya Kurdu dahil her çetiniya welati halkerdene de, gere ke her kes tenê xo bivurno.

Eve kilmekiye Partiyê Kurdu, Partiyê Tirku, Partiyê Sosyal demokrat u Çhepçiu hata ve MHP bile gereke xo bivurnê.

Sa Kemal Kiliçdaroglu ke amo umumi serveriya CHP, aê de vurnayêne biyo ra. Na vurnayêne hetê Demokrasi ser asena, programê weçintena 2011 Hazirane ke ilanet kerd daha areze asa ke, CHP meyilê vurnayêne dera. Mavênê namzetunê Mebusiye tayin kerdene de

Sa Kiliçdaroglu ra mi rê silayiye amê. Na mordemê maê cisne rezi mira vake ke “Usê laaqê Anadoliye ra xizmeta Demokrasi de wazen ke, ti ki wertê mebusunê CHP de Welati rê xizmete bikerê.”

Waxtê mino derg eke bibiyêne, ez amêne Mamekiye, mi honde ke besekerd qomê ma kerdêne top, cira pers kerdêne hen qerar dêne. Tek zu sewe waxtê mi bi. A sewe honde ke mi besekerd nas u dostu ra pers kerd. Pêroine mi ra vake ke, “Ti gere vengê ma Meclisê Tirkiya de berz kerê. Vurnayêna CHP de qewete Kemal Kiliçdaroglu dê.”

1. Sa Kiliçdaroglu mordemo de rezo, ez yinam ken ke, Tirkiya de phostdariye ke cidiyo podarê verê Demokrasi de darinê we. Qiz binde na podaru wedardenerê rayê bena ra, Qanunnama esasiye (Anayasa) newede virajina.

2. Zulmê Osmanli ra gore qomê ma dayma Cumuriyeti rê biyo phostdar, Osmanli ra dime Cumuriyati coru qomê made eve ri wayisiye nianêdo. Waxtê Cumuriyeti de 88 serrio ke, sifte zu mordemê ma amo serveriya CHP u biyo namzetê Serveziriya Tirkiya.

3. Oncia eve vatena nas u dostunê ma, heme het ra no firsato de rindo, eve laagiya qomê maê qedirgiranê mazlumi, Dêsim Meclisê Tirkia de temsil ken. Mesuliyet u xizmete ra vozdayêne, mordemo jê Kiliçdaroglu bê phosti verdayêna era ma nêsikina.

Na ruval ra mi silayiya Kiliçdaroglu qewul kerde. Isala na rayêde Dêsim karli vejino, emegdar u mazlumê Tirkiya karli vejinê, Demokrasirê xizmeta de rinde keme.

Eve esq u niaz !

Namzetê Mebusê Dêsimi

Avukat Hüseyin Aygün.